KonVer: nisma kudo dhe kurdo në të gjithë Shqipërinë për grupet e cënueshme: nga skaji (Konispoli ) në skaj (Vermosh) – Aty ku shpesh nevojat mbeten të pakonsiderueshme dhe shërbimet të padukshme! Disa nga proceset që përmban ky projekt lidhen me terma si: 

K-Kontroll;    O- Orientim ;  N- Ndërhyrje:   V- Vlerësim ;   E- Empati;   R-Rezultate.

Bashkitë në përgjithësi shpesh kanë nevojë për: zhvillimin e shërbimeve të reja sociale, zgjerimin e kapaciteteve ekzistuese, ofrimin e trajtimeve mbi burimet njerezore dhe nevojat  komunitare, asistencë në aplikime për fonde, ndihmë në implementimin e projekteve zhvillimore sipas nevojave lokale (p.sh. shërbime të kujdesit social, punësimit gjithëpërfshirës, edukimit dhe nga mbrojtja e fëmijëve e deri tek të moshuarit).

Qëllimi i këtij projekti është identifikimi i nevojave të target-grupeve të cënueshme në qarqet e vendit për të ndërhyrë ne minimizimin e përjashtimit social të tyre. Në fokus të këtij procesi do të jenë ekspertë të fushave të ndryshme për eksplorimin e nevojave duke i dhënë një dimension profesional e multidisiplinar e ndër-institucional 

Fazat e identifikimit të nevojave do të realizohen përmes një hulumtimi paraprak mbi vlerësimin e evidencave ekzistuese si në statistika apo raste konkrete, rrjetëzim konceptesh, ndarje funksionale të aktorëve bashkiakë, dëgjime publike e fokus-grupe me profesionistë lokalë; pyetësorë dhe intervista gjysëm të strukturuara; analizë e faktorëve situacionalë dhe objektivë: 

Bazuar në të dhënat e mbledhura, URF do të: identifikojë sfidat kryesore në ofrimin e shërbimeve sociale për ti mbështetur bashkitë në projekte të ardhshme që i përgjigjen nevojave të tyre;  do të rekomandoojë modele ndërhyrjesh për komunitetet lokale; sigurojë analiza të krahasuara midis bashkive për prioritete të ardhshme duke pasqyruar konkretisht mangësitë në lidhje me specifikat e grupeve të cënueshme e duke krijuar një databazë kombëtare për nevojat e shërbimet që ofrohen aktualisht e boshllëqet që ekzistojnë në të gjithë vendin me qëllim ndërmarrjen e nismave konkrete për ndërhyrje specifike në mbështetje të grupeve vulnerabël.

Sinenergjia në drejtim të bashkëpunimit e mbështetjes konkrete për re-integrim në shoqëri të grupeve të përjashtuara sociale është forma më e lartë e qytetarisë aktive dhe kontribut i drejtëpërdrejtë në trajtimin me dinjitet të cdo grupi të cënueshëm duke i dhënë përparësi të drejtave të njeriut!